Héraðssambandið Skarphéðinn

Reglugerð um körfuknattleiksmót HSK

1. gr.

Körfuknattleiksnefnd HSK ákveður í samráði við þáttökulið með hvaða hætti héraðsmótin eru leiki hverju sinni.

2. gr.

Í upphafi keppnistímabils skal tímasetja og staðsetja alla leiki í mótunum og gefa út mótaskrá, þar sem fram koma upplýsingar um alla leikina. Lið skulu tilkynna þátttöku fyrir 15. september. Með þátttökutilkynningunni þarf að gefa upp liðstjóra og þá tíma sem liðin hafa til umráða vegna heimaleikja og þegar mótaskrá hefur verið gefin út þá skulu liðin fastsetja húsin þessa daga.

3. gr.

Að loknum leik skal heimalið koma leikskýrslu tafarlaust á skrifstofu HSK. Leiksskýrslur skulu vera vandaðar og leikmenn og starfsmenn skrifaðir fullu nafni. Heimalið skal fara yfir stigaskor einstaklinga í báðum liðum og láta fylgja með. Auðvelt er að póstsetja leikskýrslur ef ekki fellur til önnur ferð. Stefna skal að því að birta úrslit og stöðuna í mótinu í héraðsfréttablöðum.

4. gr.

Ekki er hægt að fresta leik nema að óviðráðanlegum örsökum. Ef lið getur ekki mætt til leiks skal fulltrúi liðsins hafa samband við körfuknattleiksnefnd HSK sem þá metur hvort leik skal frestað eða ekki. Ef leik er frestað skal fara fram frestun í síðasta lagi 10 dögum fyrir leik og skal sá leikur helst leikinn innan viku frá upphaflegum tíma. Skal nefndin í samráði við hlutaðeigandi lið ákveða leikstað og leiktíma um leið og frestun er ákveðin. Ef heimalið virðir ekki þessa reglu getur það misst heimaleikinn til andstæðinganna, körfuknattleiksnefnd ákveður það hverju sinni. Ef lið mætir ekki til leiks og ekki hefur verið fengin frestun þá skal því liði dæmdur sá leikur tapaður.

5. gr.

Ef tvö lið eða fleiri eru jöfn að stigum í lok keppnistímabils skal þeim raðað samkvæmt eftirfarandi. Fyrst skal farin leið 1, þá 2 og ef enn er jaft er leið 3 farin. 1. Það lið sem hefur flest stig í innbyrðis viðureignum 2. Það lið sem hefur hagstæðasta skor í innbyrðis viðureignum 3. Það lið sem hefur hagstæðast skor í mótinu í heild. Lið sem gefið hefur leik eða hefur verið dæmdur tapaður leikur getur aldrei hagnast á því og skal því alltaf standa verst af þeim liðum sem jöfn standa að stigum.

6. gr.

Ef einhver vandamál og ágreiningsmál koma upp á keppnistímabilinu áskilur körfuknattleiksnefnd HSK sér rétt í að dæma í þeim málum samkvæmt þessari reglugerð. Ef lið óska að kæra leik skal kæran send til íþróttadómstóls HSK, sem tekur viðkomandi kæru fyrir.

7. gr.

Dómarar skulu mæta samkvæmt útgefinni leikskrá. Liðum er heimilt að fá hlutlausa dómara frá öðrum liðum fyrir sig, en liðið er samt sem áður ábyrgt fyrir dómgæslunni og skal sjálft sjá um að útvega þessa dómara. Nauðsynlegt er að tveir dómarar dæmi hvern leik. Þar sem heimalið eiga að sjá um dómara sjálf bera þau ábyrgð á að fá dómara. Dómarar í meistaraflokki karla skulu hafa sótt dómaranámskeið.

8. gr

Heimalið skal sjá um að ábyrgur ritari og tímavörður séu á öllum leikjum.

9. gr.

Forráðamenn liða skulu hafa samband fyrir hvern leik. Einnig skal hafa samband við fulltrúa þess liðs sem á að sjá um dómgæslu.

10. gr.

Leikmaður er löglegur í héraðsmótunum, ef hann hefur ekki leikið með öðrum liðum á keppnistímabilinu. Ef leikmaður sem leikið hefur með einhverju liði á keppnistímabilinu vill skipta um lið skal hann fylla út þar til gert eyðublað og skila því til skrifstofu HSK. Leikmaður verður þá löglegur með nýja liðinu eftir einn mánuð, þ.e. eftir að umsókn var póstlögð eða móttekin af framkvæmdastóra HSK eða fulltrúa körfuknattleiksnefndar HSK. Óheimilt er að tilkynna félagaskipti eftir 15. desember.

11. gr.

Að öðru leyti skal spilað eftir leikreglum KKÍ.

Tilbaka