Héraðssambandið Skarphéðinn

24. mars 2021

Guðbjörg Viðarsdóttir sæmd silfurmerki HSK

Á stjórnarfundi HSK í gær var ákveðið að veita Guðbjörgu Viðarsdóttir silfurmerki HSK og veitti hún merkinu viðtöku á aðalfundi frjálsíþróttaráðs HSK, sem fór fram í gærkvöldi.

Guðbjörg á skráðan margan árangur í afrekaskrá Frjálsíþróttasambands Íslands, sá fyrsti skráður 31.07 1983, þá 12 ára á móti í Reykjavík og kastaði kúlu 7,96 mtr. Sá síðasti sem skráður er í afrekaskrána, er frá 15. apríl 2017, kúluvarp innanhúss 9,40 mtr á Páskamóti Hrunamanna. Köstin hafa alltaf verið hennar helstu greinar, kúluvarp, sleggjukast og kringlukast. Hún æfði og keppti í mörg ár og var mikilvægur hlekkur í liði HSK á þeim árum. Hún hóf feril sinn í UMF. Dagsbrún í Landeyjum þar sem hún ólst upp. Eftir að keppni lauk hefur hún sinnt leiðtogahlutverkinu í því að þjálfa börn og unglinga í frjálsum íþróttum og tekist vel til. Hvar sem hún fer er starfið rifið upp og hvergi slegið slöku við. Í dag er hún þjálfari hjá UMF. Hrunamanna og má með sanni segja að þar er hún lykilmanneskja í að halda frjálsum íþróttum á lofti. Það er með ánægju sem stjórn Héraðssambandsins Skarphéðins hefur ákveðið að veita henni silfurmerki sambandsins fyrir allt hennar góða starf á sambandssvæðinu.

Mynd: Helgi S. Haraldsson varaformaður HSK afhenti Guðbjörgu silfurmerki HSK á aðalfundi frjálsíþróttaráðs HSK.

Deila

Tilbaka