Héraðssambandið Skarphéðinn

Sýnum karakter vinnustofa, keppni með tilgang

03.10.2019 - 04.10.2019

Dagana 3. og 4. október bjóða ÍSÍ og UMFÍ starfsmönnum eða þeim sem sjá um fræðslu-og/eða mótamál í íþróttahreyfingunni upp á vinnustofu sem stýrt verður af André Lachance frá Sport for Life Canada. Vinnustofan ber heitið Meaningful Competition sem í lauslegri þýðingu gæti verið Keppni með tilgang og lítur að keppni hjá börnum og ungmennum. Vinnustofan fer fram á 2. hæð í nýju Laugardalshöllinni. Markmið með vinnustofunni er að: Auka þekkingu á þroskaferli barna og ungmenna, LTAD (Long Term Athlete Development). Skoða hvernig keppnisfyrirkomulag hefur áhrif á innihald þjálfunar. Skoða og þróa sértækar keppnisreglur. Fá innsýn í hvernig unnið er með keppni í öðrum íþróttagreinum og í öðrum löndum. Vinna með það hvernig haga á samskiptum í breytingaferli. André Lachance hefur unnið með Hafnaboltasambandi Kanada síðan 2001 í þróunarmálum og þjálfaramenntun og sem þjálfari kvennalandsliðs Kanada. Að auki er hann prófessor við Háskólann í Ottawa og heldur fyrirlestra og vinnustofur á alþjóðlegum vettvangi. Hann hefur á síðastliðnu ári bæði haldið vinnustofur fyrir Íþróttasamband Svíþjóðar (RF) og Danmerkur (DIF). Fulltrúar ÍSÍ sátu vinnustofuna í Svíþjóð. Laugardaginn 5. október verður fjórða Sýnum karakter ráðstefnan haldin í Háskólanum í Reykjavík þar sem André Lachance verður einn af fyrirlesurum, en yfirskrift ráðstefnunnar er Hvernig getur keppnisfyrirkomulag búið til eða eyðilagt karakter? Hámarksfjöldi þátttakenda á vinnustofunni er 40 manns og hvetjum við ykkur til að skrá ykkur sem fyrst. Vinnustofan stendur frá kl. 9-16 báða dagana og er mikið lagt upp úr hópavinnu. Verð fyrir vinnustofuna er 12.500 krónur en innifalið í verðinu er hádegismatur báða vinnustofudagana, kaffi og léttar veitingar. Verð fyrir ráðstefnuna sem fram fer laugardagsmorguninn 5. október er 2.500 krónur. Vert er að geta þess að selst hefur upp á allar ráðstefnur Sýnum karakter til þessa. Skráning fer fram á báða viðburðina á https://umfi.felog.is/verslun. Ef einhverjar spurningar vakna þá vinsamlegast hafið samband við Ragnhildi eða Þórarinn Alvar hjá ÍSÍ eða Ragnheiði hjá UMFÍ.