Héraðssambandið Skarphéðinn

15. nóvember 2012

Bestu þakkir fyrir sjálfboðaliðsvinnuna

Að baki er velheppnað 15. Unglingalandsmót UMFÍ. Héraðssambandið Skarphéðinn í samstarfi við Sveitarfélagið Árborg sá um framkvæmd mótsins. Stjórn HSK setti sér það markmið að gera mótið sem glæsilegast og að okkar mati tókst það með dyggilegri aðstoð ykkar sem störfuðu með okkur við undirbúning og framkvæmd mótsins.

Gott og öflugt net sjálfboðaliða er lykilforsenda fyrir velgengni íþróttastarfs.

Íþróttahreyfingin er vettvangur öflugrar sjálfboðaþjónustu á mörgum sviðum. Sjálfboðaliðarnir gera íþróttafélögin að lifandi grasrótarhreyfingu sem er vettvangur tækifæra til að leggja sitt af mörkum í samfélagsþjónustu og fá um leið tækifæri til vaxtar og reynslu sem nýtist í viðfangsefnum daglegs lífs.

Störf sjálfboðaliðanna er nauðsynlegur þáttur í íþrótta- og æskulýðsstarfi, þau efla samstarf, umhyggju og kærleika og fela í sér margbreytta og lærdómsríka reynslu af félagsstörfum að ógleymdri ánægjunni að því að skapa verðmætt framlag til samfélagsins.

HSK óskaði eftir liðsinni sjálfboðaliða við undirbúning og framkvæmd mótsins og svöruðu fjölmargir kallinu og mættu til starfa með okkur og lögðu á sig mikla og óeigingjarna vinnu til þess að mótið mætti heppnast sem best.

Alls greiddu 1952 þátttakendur þátttökugjald og reikna má með að um 15.000 gestir hafi sótt mótið. Tekjur vegna mótsins voru 20,8 m.kr. og kostnaður um 12,7 m.kr. og hagnaður því um 8 miljónir króna. Samkvæmt ákvörðun héraðsþings skiptist hagnaðurinn á eftirfarandi hátt:

20% fóru til HSK, 10% fóru í Verkefnasjóð HSK og 70% til aðildarfélaga í réttu hlutfalli við vinnustundir. Veitingasalan skilaði um 1,8 m.kr. hagnaði og því runnu um 9,9 m.kr. til íþróttahreyfingarinnar.

Sjálfboðaliðar unnu 7241 klukkustund við mótshaldið, og 855 stundir við veitingasölu og skiluðu þannig samtals 8096 stundum í vinnu fyrir félögin sín. Auk þessa skiluðu starfsmenn sveitarfélagsins mjög góðu starfi.

Fyrir hönd stjórnar HSK og framkvæmdanefndarinnar færum við öllum sem lögðu lóð á vogarskálarnar og gerðu okkur kleyft að halda 15. Unglingalandsmót UMFÍ með miklum myndarbrag, bestu þakkir fyrir kröftugt og öflugt framlag við undirbúning og framkvæmd mótsins og væntum góðs samstarfs við ykkur við skipulagningu og framkæmd 27. Landsmóts UMFÍ á Selfossi 2013. Sérstakar þakkir fá sjálboðliðar, samstarfsaðilar, Sveitarfélagið Árborg og starfsmenn þess fyrir frábæra samvinnu og aðstoð. Íbúum Selfoss færum við góðar þakkir fyrir veitta aðstoð og hjálp. Gestum mótsins þökkum við þátttökuna og þá sérstaklega okkar frábæru unglingum sem voru svo sannarlega sigurvegarar mótsins.

Guðríður Aadnegard, formaður HSK og

Þórir Haraldsson formaður framkvæmdanefndar ULM.