Héraðssambandið Skarphéðinn

2. febrúar 2026

Fundað með félögum í Uppsveitum Árnessýslu

Fundarlotu HSK með aðildarfélögum og sveitarfélögum á sambandssvæðinu lauk með fundi á Flúðum þann 19. janúar sl. Þangað var boðið forystu 19 aðildarfélaga HSK sem starfa í Uppsveitum Árnessýslu, auk fulltrúa frá Bláskógabyggð, Grímsnes- og Grafningshreppi, Hrunamannahreppi og Skeiða- og Gnúpverjahreppi.

Um 100 manns mættu samtals á fundina fjóra í vetur, en í október og nóvember voru haldnir fundir í Þorlákshöfn fyrir Ölfus og Hveragerði, á Hellu fyrir Rangárþing og á Selfossi fyrir Árborg og Flóa.

Fjölmörg mál voru rædd á fundunum, má þarf nefna sjálfboðalisstörf, aðstöðumál, samninga félaga við sveitarfélögin, samstarfsverkefni, svæðisskrifstofur íþróttahéraða, fjármál og styrktarsjóði sem veita fjármagni til íþróttahreyfingarinnar.

Guðríður Aadnegard formaður HSK sagðist í lok fundar á Flúðum vera ánægð með fundina í vetur og nefndi að full ástæða væri halda fleiri fundi sem þessa innan héraðs.

Þess má geta að formenn aðildarfélaga HSK hafa fengið fundarboð um að mæta á Formannafund HSK, sem haldinn verður 19. febrúar nk.

Mynd: Frá fundinum á Flúðum.

Deila

Tilbaka