Héraðssambandið Skarphéðinn

2. september 2026

Árlegt Ólympíuhlaup ÍSÍ að hefjast

Ólympíuhlaup ÍSÍ 2026 verður sett í Dalvíkuskóla á Dalvík fimmtudaginn 3. september. Grunnskólar um allt land geta staðið fyrir Ólympíuhlaupi ÍSÍ fram til áramóta og skráð þátttakendur í gegnum skráningarformið sem nálgast má á vef ÍSÍ. Þeir skólar sem skrá þátttöku fyrir 9. október gætu átt von á veglegum útdráttarverðlaunum.

Ólympíuhlaup ÍSÍ, sem áður hét Norræna skólahlaupið, hefur verið fastur liður í skólastarfi fjölmargra grunnskóla frá árinu 1984 þegar hlaupið var haldið í fyrsta sinn. Þessi viðburður er tengdur Íþróttaviku Evrópu / BeActive.

Markmið Ólympíuhlaups ÍSÍ er að hvetja nemendur til reglulegrar hreyfingar og stuðla þannig að betri heilsu, vellíðan og jákvæðum lífsvenjum. Áður gátu nemendur valið á milli 2,5 km, 5 km og 10 km vegalengda, en nú hafa skólar aukið svigrúm til að ákveða vegalengdir sjálfir með hliðsjón af aðstæðum og umhverfi hvers skóla.

Að hlaupi loknu fær hver skóli viðurkenningarskjal þar sem fram kemur fjöldi þátttakenda og samanlögð vegalengd sem hlaupin var. Áherslan er fyrst og fremst á holla hreyfingu, þátttöku allra og að nemendur njóti þess að taka þátt.

Grunnskólar á sambandssvæði HSK eru hvattir til þátttöku. Þeir skólar sem skrá þátttöku fyrir 9. október fara í pott þar sem dregið verður um 150.000 króna gjafabréf frá Altis.

Skráning í Ólympíuhlaupið 2026

Deila

Tilbaka