Héraðssambandið Skarphéðinn

Reglugerð um Bændaglímu Suðurlands

1. gr.

Bændaglíma Suðurlands er glímukeppni, sem haldin skal minnst þriðja hvert ár á sambandssvæði Héraðssambandsins Skarphéðins í minningu Sigurðar Greipssonar, fyrrum glímukappa, bónda og skólastjóra í Haukadal í Biskupstungum.

2. gr.

Glímunefnd H.S.K. sér um undirbúning og framkvæmd keppninnar og velur þátttakendur af sambandssvæði H.S.K. Bændaglíman skal haldin með sérstökum hátíðarblæ í tengslum við héraðsþing HSK eða aðra viðburði í starfi HSK.

3. gr.

8 - 10 glímumenn skulu vera í hvorri þátttökusveit bændaglímunnar og skal að minnsta kosti önnur sveitin vera af sambandssvæði H.S.K. Ef sveit utan H.S.K. er fengin til bændaglímunnar, sér glímunefnd H.S.K. um að bjóða félagi eða héraðssambandi til þátttöku í keppninni.

4. gr.

Þátttökusveitir velja sér fyrirliða (heimabændur) og stjórna þeir hvor sínu liði í keppninni. Glímt skal í 2 mínútur í hverri viðureign. Heimabóndi gengur síðastur til leiks, þ.e.a.s. þegar allir liðsmenn hans eru fallnir.

5. gr.

Sigursveitin í glímunni fær til varðveislu í eitt ár veglegan farandbikar, (Sigurðarbikarinn). Allir keppendur í glímunni fá til minja um þátttökuna verðlaunapeninga, sigursveitin gull en hinir silfur. Um "Sigurðarbikarinn" skal keppt 20 sinnum, en að þeim tíma liðnum skal hann tekinn úr umferð og varðveittur í safni verðlaunagripa H.S.K. Annar verðlaunagripur kemur þá í umferð.

6. gr.

Reglugerð þessi tekur gildi eftir samþykkt héraðsþings H.S.K. Einfaldur meirihluti atkvæða ræður samþykkt eða synju, sömuleiðis varðandi breytingar á reglugerðinni.

(Samþykkt á héraðsþingi að Laugalandi 1987. Breyting á 5. gr. á héraðsþingi í Félagslundi 1988 og breyting á 1., 2. og 5. gr. á hérðaðsþingi á Hellu 1995)

Tilbaka