Héraðssambandið Skarphéðinn

Reglugerð fyrir verkefnasjóð HSK

1. gr.

Sjóðurinn heitir Verkefnasjóður HSK og er stofnaður á héraðsþingi HSK 26. febrúar 2000. Stofnframlag er kr. 73.562.

2. gr.

Tilgangur sjóðsins er að styrkja félags- og íþróttastarf á sambandssvæði Héraðssambandsins Skarphéðins. Sjóðurinn veitir ekki styrki til mannvirkjagerðar. Að öðru leyti fer úthlutun úr sjóðnum eftir mati stjórnar sjóðsins.

3. gr.

Eingöngu stjórnir aðildarfélaga HSK, deildir aðildarfélaga, sérráð sambandsins og starfsnefndir Skarphéðins geta sótt um styrk úr sjóðnum.

4. gr.

Stjórn sjóðsins skipa formaður, ritari og gjaldkeri HSK og ákveður hún úthlutun úr sjóðnum.

5. gr.

Vörslu sjóðsins og reikningshald annast gjaldkeri HSK.

6. gr.

Tekjur sjóðsins eru:
a) 8 % af óskiptum lottótekjum HSK.
b) 10 % af útbreiðslustyrk frá ÍSÍ.
c) 25 % af framlagi Íslenskra getrauna til HSK.
d) Frjáls framlög og söfnunarfé.
e) Vaxtatekjur.

7. gr.

Styrkupphæð miðast við fjármagnsgetu sjóðsins hverju sinni.

8. gr.

Með umsóknum skal fylgja greinargerð og fjárhagsuppgjör um þau verkefni sem sótt er um, þar sem fram kemur til hvers styrkurinn er ætlaður.

9. gr.

Úthlutun úr sjóðnum fer fram tvisvar á ári, 1. maí og 1. nóvember. Umsóknir þurfa að berast fyrir 1. apríl vegna úthlutunar í maí og 1. október vegna nóvemberúthlutunar. Umsóknir skulu vera undirritaðar af formanni viðkomandi umsækjenda.

Stjórn sjóðsins er heimilt að úthluta úr sjóðnum á fyrri hluta árs til undirbúnings Landsmótsliðs HSK á landsmótsári. Upphæðin skal þó ekki vera hærri en sem nemur 1/3 af heildartekjum sjóðsins síðastliðið ár.

Stjórn sjóðsins er heimilt að veita styrki úr sjóðnum vegna framúrskarandi árangurs einstaklinga og liða, án þess að umsókn hafi borist.

10. gr.

Reglugerð þessi er samþykkt á héraðsþingi HSK á Borg í Grímsnesi þann 26. febrúar 2000 og öðlast þegar gildi. Með samþykkt þessari falla úr gildi reglugerðir um aðra sjóði HSK.

(Samþykkt á héraðsþingi árið 2000,
breyting á 2. og 9. gr. samþ. á héraðsþingið 2004,
breyting á 9. gr. samþ. á héraðsþingið 2017)

Tilbaka