Héraðssambandið Skarphéðinn

Siðareglur HSK

Markmið sambandsins með þessum reglum er að veita öllum þeim sem taka þátt eða starfa á vegum og í nafni þess almennar leiðbeiningar við störf þeirra og skyldur. Til þess að reglurnar geti gegnt sínu hlutverki þurfa þær að njóta almenns stuðnings og samþykkis þeirra sem þær taka til.

Þessar reglur eiga að vera hvetjandi og leiðbeinandi í senn og skulu kynntar öllum sem koma fram í nafni sambandsins. Þessar siðareglur eru ekki eingöngu leiðbeinandi. Verði uppvíst um brot á reglum þessum áskilur stjórn sambandsins sér rétt til að grípa til viðeigandi ráðstafana og taka ákvörðun um viðurlög eftir því sem við á.

Stjórnar-, nefndarmaður eða annar starfsmaður HSK:

Gegnir störfum sínum af heiðarleika með hagsmuni sambandsins að leiðarljósi og stendur vörð um markmið og heiður þess.
Kemur jafnt fram og af virðingu við alla þá sem starfað er með eða fyrir. Mismunar engum með orðum eða hegðun á grundvelli þjóðernis, uppruna, kynþáttar, litarháttar, kyns, aldurs, trúarbragða, skoðana, kynhneigðar, fötlunar, efnahags eða ætternis.
Hagar störfum sínum þannig að öll starfsemi og vinnubrögð séu opin, upplýst, gagnsæ og unnin á lýðræðislegan hátt.
Notfærir sér aldrei aðstöðu sína innan sambandsins í þágu eigin hagsmuna á kostnað annarra.
Leitast við að skapa jákvætt andrúmsloft í starfi. Gætir hófs og sanngirni í ummælum um aðra og forðast slúður og rógburð. Kynferðisleg áreitni eða einelti er ekki liðið.
Fer vel með fjármuni og önnur verðmæti sambandsins. Hefur ætíð hagsmuni sambandsins að leiðarljósi við ráðstöfun fjármuna. Aldrei er heimilt að skuldbinda sambandið umfram samþykktir. Notar fjármuni og eigur aldrei nema í þágu sambandsins eða verkefna sem samræmast stefnu þess.
Setur upplýsingar um tekjur og ráðstöfun þeirra fram á einfaldan og skýran hátt og hefur upplýsingar aðgengilegar félagsmönnum hvenær sem er. Allar færslur á fjármunum skulu skráðar með viðeigandi hætti og tækar til endurskoðunar.
Þiggur aldrei gjafir ef verðmæti þeirra er umfram það sem eðlilegt getur talist.

Sjálfboðaliði eða starfsmaður í barna- og unglingastarfi hjá HSK:

Kemur eins fram við alla þátttakendur og mismunar aldrei börnum og unglingum með orðum eða hegðun á grundvelli þjóðernis, uppruna, kynþáttar, litarháttar, kyns, aldurs, trúarbragða, skoðana, kynhneigðar, fötlunar, efnahags eða ætternis.
Er meðvitaður um hlutverk sitt sem fyrirmynd og sýnir góða hegðun og gott fordæmi jafnt í starfi sem og utan þess.
Viðhefur jákvæða gagnrýni og forðast neikvæða gagnrýni.
Talar ávallt gegn neyslu áfengis og tóbaks sem og notkun ólöglegra lyfja, og verður aldrei uppvís að slíkri neyslu í starfi með börnum og unglingum.
Misnotar aldrei stöðu sína á nokkurn hátt, svo sem líkamlega, andlega eða kynferðislega þegar kemur að samskiptum við þátttakendur eða annað starfsfólk og sjálfboðaliða. Stofnar aldrei til náins sambands við þátttakanda.
Líður aldrei einelti og leitast við að koma í veg fyrir hvers konar ofbeldi, svo sem andlegt, líkamlegt eða kynferðislegt.
Gætir fyllsta trúnaðar og þagmælsku um þau trúnaðarmál sem hann fær vitneskju um í störfum sínum. Þagnarskylda á þó aldrei við verði hann var við að barn búi við óviðunandi uppeldisaðstæður, verði fyrir áreitni, ofbeldi eða öðru slíku. Í þeim tilfellum ber að fylgja ákvæðum IV. kafla barnaverndarlaga nr. 80/2002.
Er meðvitaður um ábyrgð rafrænna samskipta og forðast samskipti við þátttakendur gegnum síma og internet nema til upplýsinga.
Leitast við að eiga góð samskipti við samstarfsfólk og forráðamenn þátttakenda.

Íþróttaiðkandi eða -keppandi HSK:

Gerir alltaf sitt besta.
Virðir alltaf reglur og venjur varðandi heiðarleika (Fair Play) í íþróttum.
Fer ætíð að keppnisreglum, virðir tímamörk og önnur atriði varðandi framkvæmd íþróttamóta.
Neytir aldrei ólöglegra lyfja til að bæta árangur sinn.
Sýnir öllum iðkendum virðingu, jafnt samherjum sem keppinautum.
Sýnir ávallt fyrirmyndarframkomu, jafnt utan vallar sem innan, og hefur hugfast að hann sé fyrirmynd yngri iðkenda.
Þrætir ekki eða deilir við starfsmenn móta og dómara.

(Siðareglurnar voru samþykktar á héraðsþingi HSK 9. mars 2013)

Tilbaka