Héraðssambandið Skarphéðinn

12. apríl 2012

Landsmót UMFÍ 50+ í Mosfellsbæ

Ósköp held ég að það sé gaman að vera ungur í dag, ekki síst ef maður hefur áhuga á íþróttum. Það er dásamlegt að fylgjast með öllum krökkunum sem farin eru að sýna hvað í þeim býr í hinum ýmsu íþróttagreinum. Aðstaðan til íþróttaiðkunar hefur líka tekið stakkaskiptum frá því að við sem komin erum á efri ár vorum að reyna að stunda íþróttir við lélega aðstöðu, óvíða sérstakir vellir og ef þeir voru til þá voru það malarvellir misgóðir. Líka var tilsögnin ekki alltaf upp á marga fiska og sumir æfðu og æfðu án nokkurrar tilsagnar. Reynt var að finna einhverja slétta flöt til að atast á. Þetta er raunar saga mín frá unglingsárum í hnorskurn. Íþróttaáhuginn var óseðjandi en aðstæður slakar, enda varð árangurinn eftir því. Nú geta flestir sem áhuga hafa stundað íþróttir við bestu aðstæður og með góða þjálfara sér til halds og trausts.

En við þessi eldri höfum ekki öll látið þetta á okkur fá, við böslum sum hver ennþá og höfum gert í gegnum tíðina og ég er ekki í vafa um að þessar fátæklegu íþróttatilraunir okkar á yngri árum og alla tíð síðan í einhverri mynd hafa komið okkur mörgum til góða með betri heilsu. Hreyfing er okkur öllum nauðsynleg ekki síst þegar við eldumst. Fjölmargir og sífellt fleiri eldri borgarar stunda reglubundna hreyfingu, flestir með gönguferðum, en margt fleira er í boði, líkamsræktarstöðvar eru víða og það sem er hvatinn að þessari grein minni, iðkun íþrótta af sem fjölbreyttustu tagi. Trúlega eru frjálsar íþróttir, sund, golf og boltaíþróttir þær íþróttir sem þeir gætu iðkað í auknum mæli sem farnir eru að eldast og vilja halda líkamanum í sem bestu formi. Hestamennska er líka ákjósanleg fyrir alla aldursflokka.