Héraðssambandið Skarphéðinn

12. apríl 2012

Landsmót UMFÍ 50+ í Mosfellsbæ, framhald

Nú hefur UMFÍ tekið upp á að halda íþróttalandsmót fyrir okkur eldri félaga, það fyrsta var haldið á Hvammstanga síðastliðið sumar og var kallað Landsmót UMFÍ 50+. 50+ þýðir að mótið sé fyrir 50 ára og eldri. Næsta Landsmót UMFÍ 50+ verður haldið í Mosfellsbæ dagana 8. ? 10. júní næstkomandi. Þar verður keppt í 20 mismunandi íþróttagreinum sem eru eftirtaldar: badminton, blak, bridds, frjálsar, golf, götuhlaup, hestaíþróttir, knattspyrna, kraftlyftingar, leikfimi dans, línudans, pútt, ringó, skák, sund, starfsíþróttir, strandblak, sýningar og þríþraut. Þarna ættu æði margir að geta fundið eitthvað við sitt hæfi. Í sumum íþróttum geta allir keppt saman án tillits til aldurs, en t.d. í frjálsum íþróttum og sundi er keppt í aldursflokkum svo menn etja kappi við sem næst jafnaldra sína. Keppt er í flokkum 50 ? 54 ára, 55-49 ára og svo framvegis og gæti elsti flokkurinn hæglega verið 95-99 ára.

Á mótið á Hvammstanga mættu á þriðja hundrað keppendur, en ekki nema örfáir sem kepptu undir merki HSK. Ég vil nú skora á ykkur kæru félagar í HSK að sameinast í fjölmennan hóp keppenda á mótið og fara strax að æfa og búa ykkur undir það. Síðan um miðja síðustu öld hafa ungmennafélögin innan HSK átt afbragðs íþróttafólki á að skipa, ég trúi ekki öðru en að margir í þeim hópi séu færir um að mæta og sýna að enn býr í þeim nokkur kraftur og að þeir séu enn sem fyrrum tilbúnir að vera með. Ef þið hafið ekki æft íþróttina ykkar um skeið er einmitt nú tími og tækifæri til að fara að æfa sig fyrir Landsmótið í Mosfellsbæ.

Það er þó ekki svo að HSK sendi keppendur á mótið, en allir geta mætt og keppt fyrir það félag sem þeir óska en vitanlega vilja gamlir Sunnlendingar kenna sig við HSK. Hafið samband við skrifstofu HSK, sími 482-1189 sem mun leiðbeina ykkur og sjá um skráningu á mótið. Líka er hægt að hafa samband við undirritaðan, sími 891-7364, Markús Ívarsson sími 695-9263 og Ingibjörgu Marmundsdóttur, sími 897-8231, en við þrjú erum í nefnd HSK um íþróttir eldri félaga.

Með félagskveðju, Tómas Jónsson