Héraðssambandið Skarphéðinn

16. október 2014

Málefnalegur sambandsráðsfundur UMFÍ

39. sambandsráðsfundur Ungmennafélags Íslands var haldinn sl. laugardag í Stjörnuheimilinu í Garðabæ.

Starfsemi UMFÍ frá síðasta ársþingi

Í setningarræðu Helgu Guðrúnar Guðjónsdóttur, formanns UMFÍ, kom fram að niðurstöður 48. ársþings UMFÍ sem haldið var í Stykkishólmi 2013 hafi mótað starfsemi UMFÍ á liðnu starfsári.

Á umræddu þingi var m.a. samþykkt að selja veitingahúsið Þrastalund í Þrastaskógi og í mars sl. var gengið frá þeirri sölu. Fram kom að söluandvirði Þrastalundar var 82,5 milljónir króna. Fyrir skömmu komu í ljós leyndir gallar á húsnæðinu og ákvað stjórn UMFÍ að lækka söluverðið í samræmi við það.

Á þinginu 2013 var samþykkt að fá heilbrigðis- og félagsmálráðherra til samstarfs við UMFÍ til að vinna, ásamt öðrum félagasamtökum, að stofnum ,,Forvarnarmiðstöðvar“, frjálsra félagasamtaka og er það mál í vinnslu og standa vonir til að fljótlega verði gengið frá samningi um slíkan rekstur.

Stjórnir UMFÍ og ÍSÍ skipuðu fyrir ári síðan samstarfsnefnd til að skoða möguleika varðandi notendavænna viðmót á Felix, félagakerfi hreyfinganna, en kerfið heldur utan um íþróttaiðkendur á landinu og þykir einstakt í sinni röð á heimsvísu. Með breytingunni eru vonir bundnar við að eiginleikar Felix nýtist betur.

Formaðurinn sagði mikla þörf fyrir vitundarvakningu í samfélaginu varðandi lýðheilsu þjóðarinnar og að sífellt fleiri gerðu sér grein fyrir að bætt lýðheilsa eykur heilbrigði og fjármunir sparast þar sem færri þurfa að leita á náðir heilbrigðisþjónustunnar. Stjórn UMFÍ hefur því á liðnu starfsári horft til þess að útvíkka forvarnir yfir í lýðheilsu- og forvarnir.

Helga Guðrún fór í stuttu málið yfir þau fjölmörgu verkefni sem unnið er að innan hreyfingarinnar en þau eru í stöðugri þróun í takt við tíðarandann og þarfir samfélagsins. Í máli hennar kom fram mikilvægi sjálfboðaliðastarfsins sem er grundvöllur fyrir öllu starfi hreyfingarinnar en sjálfboðaliðar vinna frábær störf um allt land. Hún hvatti fundarmenn til þess að vera duglega að sækja í sjóði UMFÍ og nýta sér þá fjölbreyttu möguleika sem felast í Evrópu unga fólksins. Helga Guðrún lagði mikla áherslu á að fundarmenn stæðu vörð um Íslenska Getspá og legðu sig fram í baráttunni við að halda óbreyttu fyrirkomulagi varðandi lottó.

Á fundinum lá frammi greinargóð og vönduð ársskýrsla þar sem gerð er grein fyrir því fjölbreytta starfi sem unnið er að á vegum UMFÍ. Áhugasamir geta nálgast skýrsluna á skrifstofu HSK.

Helga Jóhannesdóttir, gjaldkeri UMFÍ, fór yfir reikninga sambandsins ásamt Helga Gunnarssyni fjármálastjóra UMFÍ. Þar kom fram að tekjur aðalsjóðs og annarra sjóða umfram gjöld á árinu voru 37,9 milljónir króna. Samkvæmt efnahagsreikningi nema eignir félagsins 432.666.452 kr. og bókfært eigið fé í árslok er 231.684.775 kr. Eignarfjárhlutfall félagsins er 54%.

Störf vinnuhóps vegna umsóknar íþróttabandalaga að UMFÍ

Haukur Valtýsson, varaformaður UMFÍ, kynnti störf vinnuhóps vegna umsóknar íþróttabandalaga að UMFÍ frá 2013. Á þinginu í Stykkishólmi var eftirfarandi samþykkt: ,,þingið beini því til stjórnar að skipa nefnd til að taka efnislega afstöðu til þess með því að fara í viðræður um skipulag íþróttahreyfingarinnar og skiptingu fjármuna innan hennar auk breytinga á lögum“. Vinnuhópurinn hefur haldið sjö fundi þar sem velt hefur verið upp ýmsum spurningum og leitað svara. Þær snúa m.a. að því, af hverju íþróttabandalögin vilji inn í UMFÍ, hvort málið snúist um að sækja fjármagn til UMFÍ, hvernig skiptingu lottós verði háttað ef íþróttabandalögin koma inn, ætla þau að taka yfir völdin og hvaða jákvæða/neikvæða þætti geta aðildarfélög UMFÍ bent á við inngöngu íþróttabandalaga í UMFÍ. Eins og sjá má eru spurningarnar viðamiklar og mikil vinna lögð í að leita svara. Haukur fór á greinargóðan hátt yfir vel unnin störf vinnuhópsins. Fram kom í máli hans að til að fylgja störfum vinnuhópsins eftir þyrfti m.a. að funda með aðildarfélögum UMFÍ. Eins þurfa þróttabandalögin að eiga viðræður við ÍSÍ, skoða þyrfti breytta verkaskiptingu milli UMFÍ og ÍSÍ og viðræður íþróttaforystunnar og ríkisvaldsins þyrftu að eiga sér stað. Spennandi verkefni þarna á ferðinni og verður áhugavert að fylgjast með þróun mála.

Ingvar Sverrisson, formaður ÍBR og Kjartan Ásmundsson, mættu sem gestir á fundinn til að leggja orð í belg varðandi aðildarumsókn íþróttabandalaga að UMFÍ. Í máli Ingvars kom fram að nokkuð er um liðið frá því að ósk íþróttabandalaga um inngöngu var fyrst lögð fram og fór hann í örstuttu máli yfir ástæður þess að þau sækja um inngöngu. Ingvar sagði öflugt íþrótta- og æskulýðsstarf vera rekið um allt land. Ef ÍBR yrði hluti af UMFÍ sagði Ingvar að í fyrstu ætti starfið fyrst og fremst að snúast um að efla enn frekar faglega þáttinn þ.e. að gera íþrótta- og æskulýðsstarfið ennþá betra. Að mati Ingvars eru peningar og völd seinni tíma útfærsla. Kjartan hefur skrifað ritgerðina „Skipulag íþróttamála. Getur íþróttahreyfingin gert betur?“ Hann fór í örstuttu máli yfir hvernig starfsemi íþróttahreyfingarinnar gæti verið háttað svo hún skili bestum árangri og væri betur í stakk búin til að takast á við kröfur nútímans um fjölbreytt íþrótta- og tómstundastarf. Áhugasömum er bent á að Ms. ritgerð Kjartans en hana má nálgast á skemman.is og hvetjum við alla sem láta sig íþróttamál varða að lesa hana.

Framtíð landsmóta UMFÍ

Á sambandsráðsfundi UMFÍ 2012 var samþykkt að halda stefnumótandi ráðstefnu varðandi framtíð landsmóta UMFÍ. Ráðstefna var síðan haldin á Húsavík í maí 2013 og í kjölfarið voru haldnir fundir vítt og breytt um landið. Fyrir sambandsráðsfundinum í Garðabæ lá tillaga er varðar breytingar á reglugerð um Landsmót UMFÍ. Helga Jóhannesdóttir og Ómar Bragi Stefánsson fóru yfir helstu niðurstöður af stefnumótunarfundum um landsmót UMFÍ og kynntu tillögur að breytingum. Ákveðið var að senda tillögurnar til stjórnar þar sem fundarmenn vildu lengri tíma til þess að fjalla um hana og kynna breytingarnar heima í héraði. Ljóst er, að fyrir marga er Landsmót UMFÍ mikið tilfinningamál og stíga þarf varlega til jarðar, þegar breyta á jafn gamalli hefð og landsmótum.

Samþykkt að halda Vetrarlandsmót UMFÍ

Nefndarstörf gengu vel og voru fjörlegar og málefnalegar umræður og allar tillögur samþykktar lítið breyttar utan einnar. Gaman er að geta þess að samþykkt var tillaga er lýtur að Vetrarlandsmóti UMFÍ. Stefnt er að því að halda fyrsta mótið á Ísafirði 5.–7. febrúar 2016, fyrir aldurshópinn 10–14 ára. Auk hefðbundinna skíðagreina; alpa og göngu, verður keppt á snjóbrettum og freestyle skíðum. Nýjar keppnisgreinar sem allir gætu prófað verða stigasleðarallý og sundbolti. Tilvalið væri síðan að keppa innandyra í blaki, handbolta og jiujitsu þar sem þær greinar hafa ekki verið keppnisgreinar á undangengnum Unglingalandsmótum UMFÍ.

Bætt upplýsingaflæði

Undir liðnum önnur mál lofaði ritari UMFÍ að beita sér fyrir því að teknir yrðu saman minnis- og fréttapunktar af ýmsu er snertir innra starf UMFÍ og þeir sendir á forsvarsmenn sambandsaðila. Er það liður í að auka upplýsingaflæði stjórnar út í grasrótina og er það fagnaðarefni.

Fram kom á fundinum að Sigurður Guðmundsson, landsfulltrúi UMFÍ, hefur látið af störfum og færum við honum bestu þakkir fyrir gott og skemmtilegt samstarf og óskum honum velfarnaðar á nýjum starfsvettvangi.

Fundurinn var í alla staði upplýsandi og málefnalegur og ekki síst skemmtilegur.

Guðríður Aadnegard, formaður HSK

Örn Guðnason, varaformaður HSK og ritari UMFÍ